ISNIC-skólinn opnar 21. mars

Internet á Íslandi hf. opnar "ISNIC-skólann" þann 21. mars n.k. á 17. hæðinni í Höfðaturninum við Höfðatorg í Reykjavík. Með opnun "skólans" (sem er 30 manna kennslusalur með óviðjafnanlegu útsýni) hyggst ISNIC m.a. bjóða eldri borgurum upp á námskeiðið "fyrstu skrefin á Internetinu". Þá verður þjónustuaðilum ISNIC, og öðrum sérfræðingum, boðið upp á sérhæfð námskeið í uppsetningu og rekstri nafnaþjóna svo eitthvað sé nefnt.
Einnig verða haldin svökölluð "MTB-námskeið" (menntun, tækifæri, breytingar) fyrir atvinnuleitendur. Þau verða á vegum sjálfstæðs fyrirlesara í samvinnu við Vinnumálastofnun.

ISNIC-skólinn er öðrum þræði hugsaður sem framlag ISNIC til Internetsamfélagsins, með vöxt og viðgang þess í huga. Námskeiðin, og stundatafla skólans, verða auglýst síðar hér á ISNIC-vefnum.

ISNIC flytur fimmtudaginn 4. mars

Skrifstofa ISNIC verður lokuð fimmtudaginn 4. mars og föstudaginn 5. mars vegna flutninga úr Tæknigarði í Höfðaturninn við Borgartún.

Athugið að grunnþjónusta ISNIC við höfuðlénið .IS skerðist að sjálfsögðu ekki.

Skrifstofan opnar á ný mánudaginn 8. mars. Starfsmenn kveðja Tæknigarð með trega eftir rúmlega 20 ára farsælt tímabil.

Hvernig virkar Netið?

Fyrir áhugasama, þá má finna ágætt myndband á Youtube sem sýnir með afar einföldum hætti hvernig Netið virkar í raun og hvaða hlutverki samtengipunktar eins og RIX gegna.

Þarna má einnig finna myndband um hvernig DNS kerfið virkar. Starfsemi ISNIC er að finna á sama stað og "nafnaþjónar .EU" í myndbandinu. ISNIC sér m.a. um reksturinn á höfuðléninu .IS og nafnaþjónum þess.

Sjálfvirk endurnýjun minnkar hættu á lokun

Fyrir kemur að fólk og fyrirtæki missa lénin sín vegna þess að gleymst hefur að greiða árgjaldið til ISNIC, sem er kr. 7.982 m.vsk.

ISNIC-kerfið sendir tengiliðum léna ábendingar og aðvaranir í tölvupósti, og póstleggur tilkynningu um eyðingu léns. Því er nauðsynlegt að upplýsingar lénsins í rétthafaskrá (Whois) séu réttar. Það er á ábyrgð rétthafa lénsins að svo sé.

Innheimta ISNIC hvetur rétthafa léna til nýta sér sjálfvirka endurnýjun, sem finna má á vefsvæði notenda e. innskráningu. Sjálfvirk endurnýjun minnkar líkurnar á lokun lénsins vegna greiðslufalls, og þar með eyðingu þess eftir 60 daga, um leið og þjónustan sparar mikla vinnu við umsýslu og greiðslu reikninga. Notkun greiðslukorta er mjög örugg á vef ISNIC.

Aðalfundur ISNIC 2010

Aðalfundur Internets á Íslandi hf. (ISNIC) verður haldinn kl. 17.00 í dag í stofu 3 í Tæknigarði. Auk venjulegra aðalfundarstarfa verður boðið upp á léttar veitingar í Matstofu Tæknigarðs eftir fundinn. Hluthafar eru hvattir til að mæta.