Gleðilegt nýtt ár - lækkað árgjald .is léna

Starfsmenn og stjórn ISNIC óska viðskiptamönnum gleðilegs nýs árs og þakka fyrir þau liðnu, sem eru orðin 25 að tölu. Landshöfuðlénið .is verður 25 ára þann 18. nóvember nk. þótt fyrsta lénið, hi.is, hafi reyndar verið skráð þann 11. desember 1986.

ISNIC hefur nú lækkað árgjald léna um eitt þúsund krónur (12,5%) eða í kr. 6.982. Lækkun árgjaldsins er ætlað að stuðla að um 18% fjölgun léna á þessu ári. Verði fjölgunin meiri má búast við að árgjaldið lækki aftur að ári liðnu. 

Tölfræði 2011: Uppsafnaður heildarfjöldi léna var í lok árs 2011 rúmlega 36.000 lén. Nýskráð voru 7.903 lén, en 3.329 lén voru afskráð. Nettófjölgun léna á árinu 2011 var því 4.574, eða um 14,5%.

Fjölgun .is-léna hefur verið jöfn og góð undanfarin þrjú ár, eða 4.065 lén 2009, 4.165 lén 2010 og 4.574 lén á nýliðnu ári eins og áður sagði. Hins vegar dróst nettófjölgun léna saman á (hrun)árinu 2008.

Heildarfjöldi .is-léna hefur rúmlega tvöfaldast á fimm árum og er nú ríflega 36.000 lén, eða um 11% af fólksfjölda á Íslandi. Það er heldur lægra hlutfall en í Svíþjóð og Danmörku, sem hvort um sig státa af rúmlega einni milljón léna, en um helmingi hærra hlutfall en í Finnlandi og Noregi.

Skráið lén fyrir áramót - gleðilegt nýtt ár :)

Þekkt er að stofndagur og ártal léns (þ.e.a.s. aldur þess) skiptir máli varðandi leitarvélar. Þannig eru eldri lén verðmætari en yngri lén - almennt séð. Það kann því að vera ástæða til að skrá lénið fyrir áramót.

Ef þú hefur ekki skráð lén áður þarftu fyrst að skrá þig hér og fá þannig aðgang að lénaskráningu ISNIC. Skráning léns er á allra færi. Biðsvæði er frí þjónusta og sjálfvalið ef þú ert ekki tilbúinn að virkja lénið um leið og það er skráð. Sé greitt með greiðslukorti líða aðeins um 20 mínútur þar til lénið er orðið virkt. Því næst er að koma léninu í hýsingu hjá skráðum þjónustuaðilum ISNIC, sem uppfylla gæðakröfur ISNIC fyrir vistun .is léna, eða áframsenda það á gefna vefslóð, t.d. blog- eða Facebooksíðu.

Notkun léna fyrir tölvupóstfang á eigið lén fer sífellt vaxandi, en gott og traust netfang (Email) er lykilatriði þegar byggja á upp trúverðugleika í netviðskiptum. Ár eftir ár hafa .is lén mælst meðal traustustu og best upp settu léna í heimi eins og sjá má á bls. 13 í nýjustu skýrslu McAfee.

Þúsund króna lækkun á árgjaldi .is-léna

Stjórn ISNIC samþykkti sl. haust eittþúsund króna lækkun á árgjaldi .is-léna. Árgjald léna verður framvegis kr. 6.982 m/vsk. Lækkunin kemur fram á reikningum með útgáfudagsetningu frá og með 11. desember 2011. Þennan dag voru 25 ár liðin frá því fyrsta .is-lénið á Íslandi, hi.is, var skráð. Sjá skráningarskírteini hér.

Mikilli fjölgun léna, sérstaklega undanfarin 4 til 5 ár, gerir ISNIC kleift að lækka árgjaldið um 12,5% þrátt fyrir all miklar kostnaðarhækkanir. ISNIC vonast til þess að lækkun árgjaldsins stuðli að enn meiri fjölgun léna, en fjöldi þeirra er nú um 36.000, eða ríflega tvöfallt meiri en hann var í ársbyrjun 2007 þegar ný stjórn tók við ISNIC.

Söguskýring: Síðasta verðbreyting hjá ISNIC var 1. nóv. 2008 er stofngjald léna, kr. 4.532.- var fellt niður. Fyrsta lækkun áskriftargjaldsins var vegar 31.12.1998, eða fyrir 12 árum. Þá var greitt mánaðarlega fyrir lén og lækkaði gjaldið þá um 10%, úr kr. 975.- án vsk. á mánuði í kr. 878.- Árgjaldið árið 1998 var því kr. 14.683.- m.vsk. Hefði gjaldið hækkað m.v. samræmda vísitölu neysluverðs, en ekki lækkað eins og raun ber vitni, væri það nú kr. 23.179! Árgjald léna hefur lækkað nokkrum sinnum á þessu tímabili og nemur lækkunin samtals um 70% að raungildi á tólf árum. Nafnverðslækkun árgjaldsins (lækkunin í krónum talið) nemur 52%. Geri aðrir betur! 

Skráðu þitt eigið .is-lén: Ef þú hefur ekki skráð lén áður þarftu fyrst að skrá þig hér og fá þannig aðgang að lénaskráningu ISNIC. Skráning léns er á allra færi. Biðsvæði er frí þjónusta og sjálfvalið ef þú ert ekki tilbúinn að virkja lénið um leið og það er skráð.

Sé greitt með greiðslukorti líða aðeins um 20 mínútur þar til lénið er orðið virkt. Því næst er að koma léninu í hýsingu hjá skráðum þjónustuaðilum ISNIC, sem uppfylla gæðakröfur ISNIC fyrir vistun .is léna, eða áframsenda það á gefna vefslóð, t.d. blogsíðu eða Facebook.

Notkun léna fyrir tölvupóstfang á eigið lén fer sífellt vaxandi, en gott og traust netfang (Email) er lykilatriði þegar byggja á upp trúverðugleika í netviðskiptum. Ár eftir ár hafa .is lén mælst vera á meðal traustustu og best upp settu léna í heimi eins og sjá má á bls. 13 í nýjustu skýrslu McAfee.

Ný útgáfa af ISNIC reglum

Frétt þessi var áður birt 12.9.

Reglurnar um skráningu .is-léna (ISNIC reglurnar) voru endurritaðar frá grunni fyrr á þessu ári og þær uppfærðar til móts við raunverulegt (tæknilegt) fyrirkomulag lénaskráningarinnar. Ýmislegt í reglunum var orðið tæknilega úrelt, s.s. ákvæði um undirritun eyðublaða við ýmsar breytingar á skáningu léna, sem notendur sjá nú að mestu sjálfir um á ISNIC-vefnum.

Engar grundvallarbreytingar sem varða boð og bönn við skráningu léna voru gerðar. Einungis er um að ræða endurritun og málsfarsbreytingar, staðfærslu að nútímanum, eins og áður sagði, og nýja uppröðun reglnanna, ásamt reyndar nýjum lið sem fjallar um læsingu léna.

Viðskiptamenn ISNIC, og þjónustuaðilar og umboðsmenn sérstaklega, eru hvattir til að lesa nýju reglurnar yfir og senda ISNIC ábendingar. Þessi útgáfa reglnanna tók yfir eldri útgáfu þeirra 1. nóvember 2011.

Rixinn verður uppfærður í 10Gb

Internet á Íslandi hf. (ISNIC) hefur pantað nýjan og margfallt öflugri búnað fyrir RIX (Reykjavik Internet Exchange) svo bjóða megi upp á 10Gb tengingar (í stað 1 Gb nú) og búa þannig í haginn fyrir framtíðina varðandi aukningu innlendrar netumferðar. Rixinn, eins og hann er kallaður, er skiptistöð innlendrar netumferðar sem hefur þann megintilgang að koma í veg fyrir að innlend netnotkun flæði út úr landinu, og til baka um sæstrengina, með tilheyrandi viðbótarkostnaði og lengingu á svartíma fyrir alla. Fyrir áhugasama heitir þetta "Peering" á ensku, en með peering skiptast aðilar á netumferð beint á milli sín, án aðkomu þjónustuaðila.

Flestir innlendir netþjónustuaðilar (ISP-ar) tengjast Rixinum, en hægt er að tengjast honum í Höfðatorgi eða í Tæknigarði. Uppfærslan í 10Gb er eðlileg þróun á netumhverfi fyrir stóra aðila. Uppfærslan í 10 Gb styttir svartímann mjög mikið og auðveldar þeim sem uppfæra í 10 Gb að veita sérhæfða netþjónustu sem krefst mjög mikillar burðargetu, s.s. við veitingu hágæða kvikmynda- og tónlistarstrauma, en slík notkun vex hratt.