Nov 16, 2022

Lén með séríslenskum stöfum

Á degi íslenskrar tungu er rétt að minna á lén með séríslenskum stöfum – svokölluð IDN-lén. Rétt skrifuð lén eru undantekningarlaust fallegri en samsvarandi lén sem innihalda eingöngu enska lágstafi. IDN-lén eru nauðsyn ef auglýsa á lénsheiti, sem inniheldur séríslenska stafi, rétt stafsett. Dæmi um þekkt séríslensk lénsheiti eru „Tæki.is“, sem í mörg ár hefur verið áberandi á hverskyns krönum og vinnulyftum. Lénið Bótaréttur.is er annað gott dæmi, sem og lénið Þak.is, sem er trúlega lén byggingarfyrirtækis sem sérhæfir sig í þökum.

Allt of mörg dæmi eru um léna-auglýsingar sem innihalda lénsheiti, sem augljóslega ætti að innihalda séríslenskan staf eða stafi, en gerir það ekki. Slíkt ætti að heyra sögunni til, enda 15 ár síðan að ISNIC hóf að bjóða upp á séríslenska stafi í lénsheitum. Sé IDN-lénið skráð á sömu kennitölu og stofnlénið (lén með enskum lágstöfum eingöngu) reiknast sjálfkrafa ríflegur afsláttur af árgjaldinu, sem annars er kr. 6.293.-

Aðrar góðar og mikilvægar ástæður fyrir notkun IDN-léna eru; að hindra misskilning, og að hindra skráningu „veiðiléns“ (e. Phishing domain, eða Domain spoofing). Svokölluð veiðilén eru notuð til lokka (gabba) notendur inn á vef eða tölvupóst og hafa af þeim peninga með einum eða öðrum hætti. Dæmi um þekkt veiðilén eru lénin 'logregian.is' og 'landsbankl.is' sem glæpamenn skráðu til að hagnast á þeim. Tímafrekt og dýrt getur reynst að fá þannig lénum lokað og eytt. IDN-lénum er gjarnan varpað sjálfvirkt yfir á aðallénið (sett í áframsendingu) og þau henta síður fyrir tölvupóst – enda krefjast þau séríslensks lyklaborðs.

Leave a message and we will reply as soon as we can.
1+3:

Message received

Webtree
To top