Nýr DNSSEC lykill fyrir .is

Síðan landalénið .is var DNSSEC signað í október 2013, þá hefur það notað RSASHA256 lykla. Á þeim tíma var það mest notaða algrímið og það sem mælt var með að nota. Á þeim 12 árum sem liðin eru síðan þá, þá hafa nýrri algrím rutt sér leið og í dag er ECDSA-P256-SHA256 að taka fram úr RSASHA256 sem mest notaða algrímið. Helsta ástæðan er sú að þessi nýju algrím nota umtalsvert minni lykla, án þess að fórna öryggi og minnka því mikið stærð léna og svör við fyrirspurnum sem nota DNSSEC.

Nú þegar hafa nokkur stór höfuðlén skipt um algrím og nú er svo komið að ISNIC er að undirbúa breytingu fyrir .is lénið. Við höfum nú þegar gert breytingu á eigin lénum ISNIC: nic.is, isnic.is ofl. og gekk það vel og áfallalaust.

Breytingin er gerð í nokkrum skrefum og þarf að líða tími á milli skrefa til að tryggja að gögn í biðminni nafnaþjóna á netinu samsvari þeim gögnum sem birt eru á nafnaþjónum .is. Það mun því taka nokkra daga frá því að breytingin hefst og þangað til ferlinu er að fullu lokið.